तीनकुने घटना: १०८ जनाविरुद्ध मुद्दा, सरकारी वकिल समक्ष प्रहरीको प्रतिवेदन

काठमाडौं, जेठ ०९ – राजधानीको तीनकुनेमा चैत १५ गते भएको घटनासम्बन्धी अनुसन्धान पूरा गर्दै जिल्ला प्रहरी परिसर काठमाडौंले बिहीबार सरकारी वकिल कार्यालयमा मुद्दा प्रतिवेदन बुझाएको छ ।

प्रहरीले १०८ जनालाई विभिन्न गम्भीर आरोपमा अभियुक्त बनाई मुद्दा चलाउनुपर्ने राय दिएको सरकारी वकिल कार्यालय काठमाडौंका प्रवक्ता गोकुलबहादुर निरौलाले जानकारी दिए । तीमध्ये कतिपयमाथि राजद्रोह, आपराधिक उपद्रव, कर्तव्य ज्यान तथा ज्यानसम्बन्धी मुद्दामा अनुसन्धान गरिएको छ ।

दुर्गा प्रसाईंमाथि पाँचवटा अभियोग

संयुक्त जनआन्दोलन समितिका अगुवा दुर्गा प्रसाईंमाथि भने प्रहरीको राय अनुसार पाँच फरक आरोपमा मुद्दा चलाउन प्रस्ताव गरिएको छ । तीमा कर्तव्य ज्यान, ज्यानमार्ने उद्योग, राजद्रोह, आपराधिक उपद्रव र संगठित अपराध समावेश छन् ।

राप्रपाका नेताहरू पनि मुद्दाको घेरामा

यसै घटनासँग सम्बन्धित रूपमा राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्र र महामन्त्री धवलशमशेर राणा पनि हाजिर जमानीमा रहेका छन् । उनीहरूमाथि राजद्रोह र आपराधिक उपद्रवको मुद्दा चलाउने राय पेश गरिएको छ ।

फरार अभियुक्त र बालबालिका संलग्नता

घटनामा संलग्न भएको आरोपमा नौ जना अझै फरार रहेको प्रहरीको भनाइ छ। मुद्दा चलाउनुपर्ने सुझाव आए पनि केही अभियुक्तहरूको वतन खुल्न सकेको छैन । विशेष कुरा के छ भने अभियुक्त सूचीमा चार जना बालबालिका पनि रहेका छन् ।

अहिलेसम्मको अवस्था

हाल प्रहरी हिरासतमा ५३ जना छन् भने ३७ जना हाजिर जमानीमा राखिएका छन् । सरकारी वकिलले प्रहरीको रायका आधारमा अभियोजनको प्रक्रिया अघि बढाउनेछ । अभियुक्तहरूको संख्या थपघट हुन सक्नेछ र अपुरो अनुसन्धान भएकाहरूको हकमा थप अनुसन्धानका लागि निर्देशन दिन सकिने छ ।

प्रवक्ता निरौलाका अनुसार, मुद्दा दर्ता गर्न जेठ १४ गतेसम्म समय भए पनि आइतबारभित्रै अभियोजन प्रक्रिया पूरा गरी मुद्दा दर्ता गर्ने तयारी भइरहेको छ ।